Kryetari i Partia Demokratike, Sali Berisha, mori pjesë në seminarin vjetor të Bashkëpunimit dhe Planifikimit të organizuar nga Wilfried Martens Centre for European Studies, ku ngriti shqetësime për situatën politike dhe institucionale në Shqipëri.
Gjatë takimit të zhvilluar në Durrës me presidentin e Martens Centre, ish Kryeministër i Sllovakisë, Mikuláš Dzurinda, Berisha paraqiti atë që e cilësoi si një panoramë shqetësuese të gjendjes në vend, duke akuzuar qeverinë për kapje të institucioneve, manipulim të procesit zgjedhor dhe bashkëpunim me krimin e organizuar.
Kreu i opozitës tha se Partia Demokratike ka zhvilluar një fushatë intensive sensibilizimi për atë që e konsideron si dy skandale madhore, dosjen e ish-zëvendëskryeministres Belinda Balluku dhe çështjen e AKSHI-t. Sipas tij, refuzimi i kryeministrit Edi Rama për t’i hequr imunitetin Ballukut është dëshmi e kapjes së shtetit dhe mungesës së vullnetit për t’u përballur me drejtësinë.
Berisha deklaroi gjithashtu se opozita ka dokumentuar, sipas tij, raste të blerjes së votave dhe përdorimit të burimeve shtetërore për qëllime elektorale, duke kërkuar hetim të pavarur ndërkombëtar për procesin zgjedhor në Shqipëri.
Në fjalën e tij, lideri demokrat shprehu shqetësim për atë që e quajti transformim të Shqipërisë në një “narkoshtet”, duke argumentuar se tolerimi i kultivimit dhe trafikimit të kanabisit ka favorizuar zgjerimin e trafikut të drogave të forta dhe forcimin e grupeve kriminale.
“Mbyllja e syrit nuk ka qenë neutralitet, por bashkëfajësi pasive”, u shpreh Berisha, duke u bërë thirrje Bashkimit Europian dhe Shteteve të Bashkuara të rishikojnë qasjen ndaj qeverisë shqiptare.
Sa i përket integrimit europian, kreu i PD-së theksoi se partia e tij mbështet plotësisht anëtarësimin e Shqipërisë në BE, por kundërshton çdo përpjekje për uljen e standardeve. Sipas tij, procesi duhet të bazohet vetëm në merita, reforma reale, sundimin e ligjit dhe respektimin e standardeve demokratike.
Berisha u ndal edhe te çështja e Kolegjit të Europës në Tiranë, të cilën e cilësoi si një rast të rëndë lobimi të financuar me para publike shqiptare. Ai kërkoi hetim të plotë dhe transparent si nga autoritetet shqiptare ashtu edhe nga ato europiane.a.b
