Kreu i Partia e Lirisë, Ilir Meta, ka mbajtur qëndrim mbrojtës gjatë seancës gjyqësore që po zhvillohet ndaj tij, Monika Kryemadhi dhe personave të tjerë të përfshirë në dosje.
Në deklaratën e tij para gjykatës, Meta kërkoi që përgjegjësinë për çdo financim të paligjshëm të dyshuar në emër të ish-LSI-së në Shtetet e Bashkuara ta mbajnë personat që kanë firmosur dokumentet përkatëse.
Ai mbrojti gjithashtu ish-bashkëshorten e tij, Monika Kryemadhi, duke deklaruar se ajo nuk ka asnjë përgjegjësi lidhur me çështjen CEZ-DIA.
“Unë jam këtu të mbaj përgjegjësi për çdo veprim timin individual. Nuk jam as për të marrë e as për të dhënë. Unë mbaj përgjegjësi për të miat, znj. Kryemadhi nuk ka pse të mbajë përgjegjësi për CEZ-DIA”, u shpreh Meta.
Gjatë fjalës së tij, kreu i Partisë së Lirisë akuzoi Prokurorinë e Posaçme për fshehje provash dhe manipulim të fakteve, duke pretenduar se hetimi ndaj tij është ndërtuar mbi gënjeshtra dhe interpretime të pasakta.
Meta u ndal veçanërisht te kontrata me kompaninë McKeon Group, duke këmbëngulur se pagesa e vetme e kryer ka qenë 15 mijë dollarë dhe se kjo është provuar edhe nga dokumentacioni i ardhur nga autoritetet amerikane. Sipas tij, SPAK ka pasur informacion sqarues nga SHBA që në nëntor, por nuk ia ka vënë në dispozicion mbrojtjes dhe ka vijuar ta marrë në pyetje për të njëjtën çështje.
Ai hodhi poshtë gjithashtu pretendimet për përfshirjen e tij personale në marrëveshjen me GSIS, duke deklaruar se në dokumentacion nuk ekziston asnjë nënshkrim i tij dhe se marrëveshja është lidhur mes LSI-së dhe kompanisë në fjalë.a.b
