Një 38-vjeçar është arrestuar nga policia në Tiranë pasi tentoi të sulmonte një efektiv të Policisë Rrugore që ishte në krye të detyrës, duke i vendosur thikën në fyt dhe duke u përpjekur t’i merrte armën e shërbimit.
Sipas njoftimit zyrtar, ngjarja ka ndodhur mëngjesin e së premtes, rreth orës 08:20, në afërsi të kthesës së Kamzës. Shtetasi D. K., 38 vjeç i është afruar papritur punonjësit të policisë, i cili po menaxhonte trafikun rrugor, dhe i ka vendosur në fyt një mjet prerës (thikë).
Po ashtu, ai ka tentuar t’i marrë efektivit armën e shërbimit, por është neutralizuar menjëherë dhe vënë në pranga nga shërbimet e Policisë.
Specialistët për Hetimin e Krimeve të Rënda ndaj Personit arrestuan në flagrancë 38-vjeçarin për veprat penale “Vrasja e punonjësve të Policisë së Shtetit”, mbetur në tentativë, dhe “Prodhimi, mbajtja, blerja apo shitja pa leje e armëve të ftohta”.
Policia ka sekuestruar thikën e përdorur gjatë ngjarjes, ndërsa materialet procedurale i janë referuar Prokurorisë së Tiranës për veprime të mëtejshme hetimore.a.b
