Sot pritet të ekstradohen nga Dubai gjashtë persona të shpallur në kërkim ndërkombëtar nga drejtësia shqiptare, të akuzuar për përfshirje në grupe kriminale, trafik narkotikësh, pastrim parash dhe mashtrim kompjuterik.
Lajmi është bërë i ditur nga Policia e Shtetit, e cila njofton se ekstradimi realizohet në kuadër të bashkëpunimit mes Departamentit për Marrëdhëniet Ndërkombëtare në Drejtorinë e Përgjithshme të Policisë së Shtetit dhe autoriteteve të Emirateve të Bashkuara Arabe.
Sipas policisë, drejt Shqipërisë pritet të sillen:
- Kristo Qirici, alias Jetmir Hoxha, alias Jetmir Qirici, 44 vjeç;
- Shkelzen Kraja, 44 vjeç;
- Aleks Pepaj, alias Shkëlqim Pepaj, 38 vjeç;
- Devit Patrut, alias Elidon Skendaj, alias Devid Boraj, alias Fatmir Pepaj, 39 vjeç;
Të katër këta shtetas akuzohen për veprimtari kriminale në fushën e narkotikëve dhe/ose pastrim të produkteve të veprës penale, të kryera në kuadër të grupit të strukturuar kriminal.
Po ashtu, do të ekstradohet edhe:
- Ilir Lazri, alias Ilir Sula, 30 vjeç, i akuzuar për pastrim të produkteve të veprës penale në kuadër të grupit të strukturuar kriminal;
si dhe:
- Merxhan Çeliku, 34 vjeç, i akuzuar për veprën penale të mashtrimit kompjuterik, të kryer në kuadër të grupit të strukturuar kriminal.
Policia e Shtetit thekson se operacioni është rezultat i bashkëpunimit ndërkombëtar me autoritetet e Dubait dhe përbën një tjetër goditje ndaj personave të kërkuar që fshiheshin jashtë vendit.
