Igli Tare del nga SPAK pas 6 orë e gjysmë marrje në pyetje, nuk jep deklarata për mediat
Ish-futbollisti i Kombëtares shqiptare, Igli Tare, ka lënë ambientet e SPAK pas rreth 6 orë e 30 minuta marrjeje në pyetje në kuadër të hetimeve që po zhvillohen ndaj ish-zv.kryeministres Belinda Balluku.
Tare u largua pa bërë asnjë koment për gazetarët që e prisnin jashtë ambienteve të Prokurorisë së Posaçme.
Sipas informacioneve, prokurori Dritan Prençi i ka komunikuar atij marrjen si të pandehur për veprën penale të “Pastrimit të produkteve të veprës penale”, në kuadër të hetimit pasuror që po zhvillohet ndaj Ballukut.
Më herët, SPAK njoftoi se dyshon se një vilë në resortin “White Rocks” në Dhërmi, e sekuestruar së fundmi, është fshehur përmes veprimeve juridike të kryera në emër të Igli Tares.
Në kuadër të të njëjtit hetim, më parë është thirrur për të dëshmuar edhe vëllai i tij, Agron Tare, ndërsa hetimet e Prokurorisë së Posaçme vijojnë për të zbardhur rolin e personave të përfshirë dhe origjinën e pasurisë së sekuestruar.
