Një ngjarje e rëndë është shënuar pasditen e kësaj të marte në zonën e Ranës së Hedhun në Shëngjin, ku 2 persona nga Kosova kanë humbur jetën, ndërsa tre të tjerë janë shpëtuar nga mbytja.
Sipas Policisë, rreth orës 16:30 është marrë njoftim se disa persona që kishin hyrë në det për t’u larë ndodheshin në vështirësi për shkak të dallgëve të forta të shkaktuara nga era.
Menjëherë në vendngjarje kanë mbërritur shërbimet e Policisë Kufitare, efektivët e Policisë së Lezhës dhe ekipet e emergjencës. Falë ndërhyrjes së shpejtë të disa qytetarëve me Jet Ski, në bashkëpunim me policinë, u bë e mundur nxjerrja nga deti e pesë shtetasve nga Kosova.
Të pestë u transportuan me urgjencë në Spitalin Rajonal të Lezhës, por sipas informacionit paraprak nga mjekët, dy prej tyre nuk arritën të mbijetonin, ndërsa tre të tjerët po marrin ndihmë mjekësore.m.k
