Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka goditur një skemë të dyshuar vjedhjeje dhe manipulimi të llogarive bankare në një degë të UBA Bank, duke siguruar 12 masa sigurie ndaj punonjësve të saj.
Me urdhër të gjykatës janë caktuar masat “Arrest në burg”, “Arrest në shtëpi” dhe “Pezullim i ushtrimit të një detyre apo shërbimi publik” për 12 persona të dyshuar për veprat penale “Vjedhja duke shpërdoruar detyrën”, “Falsifikimi i dokumenteve” dhe “Falsifikimi kompjuterik”.
Hetimi nisi pas kallëzimit të shtetasit I.O., i cili denoncoi se nga tre llogaritë e tij bankare ishin tërhequr pa autorizim rreth 500 mijë lekë. Një kallëzim i dytë u depozitua nga vetë UBA Bank, e cila raportoi tërheqje të paautorizuara nga llogaritë e një klienteje tjetër.
Sipas prokurorisë, hetimet zbuluan se nga llogaritë e klientëve janë kryer të paktën 30 tërheqje pa mandat, ndërsa janë hapur dhe mbyllur pa autorizim depozita në euro dhe dollarë.
Në qendër të skemës dyshohet se kanë qenë drejtori i degës, Gilbert Hoxha, dhe zëvendësdrejtori, Albin Keta, ndaj të cilëve gjykata ka caktuar masën e sigurisë “Arrest në burg”. Sipas organit të akuzës, ata kanë kryer në mënyrë të përsëritur veprime të kundërligjshme duke shfrytëzuar aksesin në sistemin bankar për të përvetësuar fondet e klientëve përmes mandateve të falsifikuara, ndërhyrjeve të paautorizuara në sistem, konvertimeve valutore dhe manipulimeve me depozitat bankare.
Prokuroria dyshon se veprimet janë kryer në bashkëpunim me punonjës të tjerë të degës, të cilët ushtronin funksione si arkëtarë, supervizorë dhe specialistë të shërbimit ndaj klientit.
Masat “Arrest në shtëpi” janë caktuar për gjashtë punonjës të tjerë, të identifikuar me inicialet G.B., D.D., O.K., R.S., B.N. dhe Zh.B., të cilët akuzohen se kanë marrë pjesë në skemën e përvetësimit të parave përmes përdorimit të dokumenteve të falsifikuara dhe ndërhyrjeve në sistemin bankar.
Ndërkohë, për katër punonjës të tjerë, E.Q., I.D., E.K. dhe B.M., është vendosur masa “Pezullim i ushtrimit të një detyre apo shërbimi publik”. Sipas hetimeve, ata kanë kryer veprime bankare në raste kur mungonte dokumentacioni kontraktual, duke krijuar kushtet që skema e paligjshme të funksiononte.
Sipas prokurorisë, mekanizmi i dyshuar i vjedhjes funksiononte në disa nivele të hierarkisë së bankës, ku punonjësit me akses në llogaritë e klientëve kryenin manipulimet, ndërsa veprimet autorizoheshin nga nivelet drejtuese të degës.
Hetimet për rastin vijojnë për të përcaktuar përgjegjësitë e plota penale dhe dëmin e shkaktuar ndaj klientëve të bankës.
a.b
