Protesta e mbrëmjes në Bulevardin “Dëshmorët e Kombit” është përshkallëzuar në përplasje mes protestuesve dhe forcave të policisë.
Qytetarët e mbledhur para Kryeministrisë kanë çarë gardhin metalik të vendosur nga policia, duke tentuar të avancojnë drejt perimetrit të sigurisë. Pas thyerjes së gardhit, situata është tensionuar, ndërsa efektivët kanë ndërhyrë për të ndaluar protestuesit.
Për të shpërndarë turmën dhe për të rivendosur kontrollin, policia ka përdorur mjete ujëhedhëse, duke hedhur ujë mbi protestuesit që ndodheshin në vijën e parë të përplasjes.
Në zonë vijojnë të jenë të pranishme forca të shumta policore, ndërsa tensionet mbeten të larta. Deri tani nuk ka një bilanc zyrtar për persona të lënduar apo të shoqëruar nga policia.
