Struktura e Posaçme kundër Korrupsionit dhe Krimit të Organizuar (SPAK) ka ndërmarrë veprime të reja hetimore në kuadër të dosjes që lidhet me pronat në zonën e Zvërnecit, duke vendosur sekuestro mbi llogaritë bankare të kompanisë “Albania Land Development”.
Burime pranë hetimit bëjnë me dije se masa është marrë në kuadër të dyshimeve për një skemë të tjetërsimit të pronave në këtë zonë bregdetare, ndërsa paralelisht vijojnë verifikimet për transaksionet financiare dhe dokumentacionin e pronësisë.
Si pjesë e hetimeve, një nga administratorët e kompanisë, Redi Struga, i është nënshtruar kontrollit nga agjentët e Byrosë Kombëtare të Hetimit (BKH), të cilët po kryejnë veprime me urdhër të SPAK.
Sipas të dhënave paraprake, hetuesit po shqyrtojnë një mekanizëm të dyshuar për kalimin e pronave shtetërore në duar private. Në dosjen hetimore përmendet edhe roli i mundshëm i Strugës si ndërmjetës në kontaktet me investitorë nga Katari, të interesuar për projekte zhvillimi në zonë.
Burimet thonë se SPAK ka pezulluar qarkullimin e fondeve që lidhen me blerjen e disa parcelave, për të cilat proceset gjyqësore mbi pronësinë nuk rezultojnë ende të përfunduara.
Në qendër të hetimit është edhe Artur Shehu, i cili jeton aktualisht në Shtetet e Bashkuara. Sipas burimeve hetimore, ai dyshohet të ketë pasur një rol kyç në skemën e pretenduar të tjetërsimit të pronave në Zvërnec.
