Teksa vijojnë debatet dhe përplasjet lidhur me pronësinë e plazhit të Dalanit në Zvërnec, Prokuroria e Posaçme kundër Korrupsionit dhe Krimit të Organizuar (SPAK) ka zhvilluar mëngjesin e sotëm një operacion kontrollesh në Vlorë dhe Tiranë.
Sipas informacioneve të siguruara nga gazetari Elton Qyno, në fokus të veprimeve hetimore kanë qenë avokati Pëllumb Petritaj, i cili ka përfaqësuar familjen e Artur Shehut, si dhe Redi Struga, administrator i kompanisë projektuese “InfraKonsult” sh.p.k.
Gjatë kontrolleve janë sekuestruar dokumente, telefona celularë dhe pajisje kompjuterike, të cilat do t’i nënshtrohen verifikimeve në kuadër të hetimit.
Burime pranë çështjes bëjnë me dije se veprimet janë urdhëruar për mbledhjen e provave që lidhen me një skemë të dyshuar të përvetësimit dhe falsifikimit të dokumentacionit të pronësisë në zonën bregdetare të Dalanit.
Ndër personat e kontrolluar është edhe Pëllumb Petritaj, ish-avokat, i cili dyshohet se ka pasur rol në falsifikimin e dokumenteve të pronësisë në favor të Artur Shehut.
Kontrolle janë ushtruar gjithashtu edhe ndaj Redi Strugës, inxhinier dhe administrator i kompanisë “InfraKonsult”, e cila rezulton e përfshirë në proceset e dokumentimit dhe projektimit që lidhen me zonën në hetim.
