Kryeministri Edi Rama ka reaguar për debatet e ditëve të fundit lidhur me projektin turistik në zonën e Zvërnecit, duke paralajmëruar se do të japë sqarime të detajuara gjatë një komunikimi publik.
Përmes një postimi në rrjetin social X, Rama e cilësoi projektin si një investim të jashtëzakonshëm për Shqipërinë, duke theksuar se po punohet prej vitesh dhe se shumë nga pretendimet e hedhura së fundmi në qarkullim nuk qëndrojnë.
Kryeministri përgëzoi gjithashtu drejtuesit e Policisë së Shtetit për reagimin ndaj ngjarjeve të regjistruara gjatë protestës së zhvilluar në Zvërnec, ku pati tensione mes aktivistëve, banorëve dhe personave të angazhuar në sigurinë private të kantierit. Rama vlerësoi si të drejtë qasjen e re të “tolerancës zero” ndaj çdo punonjësi policie që cenon besimin e publikut.
Reagimi i kreut të qeverisë vjen në një moment kur projekti ka shkaktuar debat të fortë publik. Banorë të Zvërnecit dhe Pishë Poros, së bashku me aktivistë mjedisorë, kanë protestuar kundër rrethimit të territorit ku parashikohet ndërtimi i resortit turistik, duke ngritur shqetësime për pronësinë e tokave dhe ndikimin në zonën e mbrojtur të Nartës.
Një nga problematikat kryesore lidhet me konfliktet e vjetra të pronësisë. Sipas pretendimeve të banorëve, një pjesë e sipërfaqeve të përfshira në projekt janë objekt procesesh gjyqësore që zgjasin prej më shumë se dy dekadash. Ata pretendojnë se tokat u përkasin familjeve të tyre në bazë të trashëgimisë dhe të ligjit 7501, ndërsa një sërë vendimesh administrative dhe gjyqësore kanë krijuar situata të ndërlikuara ligjore mbi pronësinë.
Debati është shoqëruar edhe me akuza politike. Në denoncime publike është përmendur i ashtuquajturi “takimi i Arubës”, një mbledhje e zhvilluar në vitin 2019 në ishullin holandez Aruba, për të cilën pretendohet se lidhet me interesa të ndryshme ekonomike dhe pronësore në Shqipëri.
