Drejtori i Drejtorisë Vendore të Policisë Vlorë, Elidon Çela, është pezulluar nga detyra pas një raportimi të pasaktë zyrtar lidhur me ngjarjet e ndodhura gjatë protestës së zhvilluar në Zvërnec.
Policia e Vlorës kishte deklaruar fillimisht se gjatë protestës një grup demonstruesish kishte tentuar të dëmtonte rrethimin e kantierit të kompanisë që po zhvillon projektin në zonë dhe se një prej protestuesve, i identifikuar me inicialet E.S., ishte futur me forcë brenda territorit të rrethuar.
Sipas njoftimit të policisë lokale, protestuesi ishte shoqëruar nga punonjësit e një kompanie private sigurie drejt ambientit të rojeve, ndërsa gjatë kësaj shoqërimi kishte pësuar dëmtime fizike.
Megjithatë, pas publikimit të pamjeve dhe reagimeve të shumta në rrjetet sociale, Drejtoria e Përgjithshme e Policisë së Shtetit ka sqaruar se informacioni i dhënë nga Policia e Vlorës nuk ka qenë i saktë.
Në një reagim zyrtar, Policia e Shtetit kërkoi ndjesë publike për raportimin e gabuar, duke sqaruar se qytetari në fjalë nuk ishte futur me forcë brenda rrethimit të kantierit, ndryshe nga sa ishte deklaruar më herët nga strukturat vendore.
“Drejtoria e Përgjithshme e Policisë së Shtetit kërkon ndjesë publike për raportimin e gabuar të Drejtorisë Vendore të Policisë Vlorë, lidhur me qytetarin, që në fakt nuk është futur me forcë brenda rrethimit të kantierit, sikundër është raportuar.
Në këto rrethana dhe pavarësisht se në të gjithë pjesën tjetër komunikata e Drejtorisë Vendore të Policisë Vlorë është korrekte, Drejtori i Përgjithshëm i Policisë së Shtetit ka vendosur pezullimin e menjëhershëm nga detyra të Drejtorit të Drejtorisë Vendore të Policisë Vlorë”, thuhet në njoftim.
Vendimi vjen në një moment kur ngjarjet e protestës në Zvërnec kanë shkaktuar debat publik, veçanërisht pas publikimit të pamjeve ku një aktivist shihet duke u tërhequr zvarrë nga persona të sigurisë private.
