Kryeministri i Kroacia, Andrej Plenković, ka përcjellë një mesazh urimi për punimet e Kuvendit Kombëtar të Partisë Demokratike, duke i uruar suksese delegatëve dhe kryetarit të PD-së, Sali Berisha.
Në mesazhin e tij, Plenkoviç kujton takimin e zhvilluar me Berishën gjatë Forumit të IDU-së në Zagreb, disa javë më parë, ku sipas tij u diskutua gjerësisht mbi aktivitetin dhe procesin e reformimit të Partisë Demokratike.
“U uroj të gjithë anëtarëve të Partisë Demokratike të Shqipërisë një kuvend sa më të suksesshëm. Isha shumë i kënaqur që prita zotin Sali Berisha, mikun tim prej shumë vitesh, në Kroaci gjatë Forumit të IDU-së këtu në Zagreb. Patëm një bisedë të gjerë mbi aktivitetet dhe reformimin e partisë”, shprehet kryeministri kroat.
Plenkoviç thekson se partia e tij dhe Partia Demokratike ndajnë të njëjtin orientim të qëndrueshëm pro-europian, ndërsa shpreh mbështetjen e plotë të Bashkimit Demokratik Kroat për suksesin e Kuvendit dhe objektivat e ardhshme politike të demokratëve shqiptarë.
“Ne ndajmë të njëjtin orientim të qëndrueshëm pro-europian dhe dëshiroj t’ju jap mbështetjen e fortë të Bashkimit Demokratik Kroat për një kuvend të suksesshëm të partisë dhe për suksese të mëtejshme elektorale. Të gjitha të mirat nga Zagrebi”, përfundon mesazhi i tij.
