Banorët e zonave të Zvërnecit dhe Pishë Poros kanë zhvilluar një tjetër protestë në Portonovë, duke kundërshtuar punimet që po kryhen në territor dhe duke kërkuar njohjen e të drejtave të tyre pronësore mbi tokat që pretendojnë se u përkasin prej brezash.
Protestuesit deklarojnë se prej vitesh janë të përfshirë në procese gjyqësore për zgjidhjen e çështjeve të pronësisë dhe se ndërhyrjet e fundit në terren, përfshirë vendosjen e gardheve rrethuese, u kanë kufizuar aksesin në zonat bregdetare ku, sipas tyre, kanë jetuar dhe punuar familjet e tyre. Ata e konsiderojnë situatën si një shpronësim de facto, ndërsa theksojnë se çështja e pronësisë nuk ka marrë ende një zgjidhje përfundimtare ligjore.
Në këtë zonë është planifikuar ndërtimi i një kompleksi të madh turistik nga kompania “Zvërnec South Adriatic Development”, projekt që lidhet me investitorë ndërkombëtarë, mes të cilëve janë përmendur Jared Kushner, Ivanka Trump dhe biznesmenët nga Katari, Ramez dhe Mohamad Al-Khayyat. Projekti ka marrë miratimin e institucioneve përgjegjëse dhe parashikon zhvillime të mëdha turistike përgjatë vijës bregdetare të Nartës.
Megjithatë, nisja e punimeve paraprake dhe rrethimi i një pjese të territorit kanë sjellë kundërshtime të forta nga banorët vendas dhe organizata të ndryshme mjedisore, të cilat kanë ngritur shqetësime si për ndikimin në mjedis, ashtu edhe për konfliktet e pazgjidhura të pronësisë.
Çështja e pronave në Zvërnec dhe Pishë Poro vijon të mbetet objekt mosmarrëveshjesh prej më shumë se dy dekadash. Banorët mbështesin pretendimet e tyre në trashëgiminë familjare dhe legjislacionin për ndarjen e tokës bujqësore, ndërsa vendime të ndryshme administrative dhe gjyqësore kanë prodhuar interpretime të ndryshme mbi statusin e pronësisë.
Ndërsa proceset gjyqësore vazhdojnë, banorët shprehen se zhvillimet e reja në terren rrezikojnë të thellojnë konfliktin ekzistues, duke kërkuar pezullimin e punimeve deri në një zgjidhje të qartë dhe përfundimtare të çështjes së pronave.
