Goditet një grup që merrej me shpërndarjen e lëndëve narkotike pranë shkollave në zonat e Shijakut dhe Manzës. Policia e Durrësit ka ekzekutuar 17 masa sigurie ndaj personave të dyshuar për përfshirje në aktivitet kriminal të prodhimit dhe shitjes së heroinës, kokainës dhe kanabisit.
Sipas autoriteteve, 13 prej të dyshuarve janë lënë në masën “arrest me burg”, ndërsa për 4 persona është vendosur “arrest shtëpie”. Një tjetër person është shpallur në kërkim.
Në pranga kanë rënë Ervin Tahiri, Ervin Keçi, Fabrinio Durmishi, Hamdi Ibrahimi, Klevi Shani, Oligert Xhani, Elson Gjepali, Marjo Gjoshi, Indrit Dauti, Saimir Vezi, Ermal Çalliku, Armand Emini dhe Tani Muça, i njohur ndryshe edhe me mbiemrin Ferra.
Gjatë operacionit policor, efektivët kanë ushtruar kontrolle fizike dhe në banesa, ku janë sekuestruar 3 armë zjarri, konkretisht dy pistoleta dhe një kallashnikov, si dhe shuma parash, automjete dhe telefona celularë.
