Një konflikt i rëndë mes ortakëve të kompanisë FINMAN SH.P.K. ka degjeneruar në dhunë fizike, pas një mbledhjeje të Asamblesë së Shoqërisë. Kompania zotëron aksione në disa projekte dhe shoqëri të njohura në vend, mes tyre Alb Star SHPK, Manastiri Resort dhe Arena Center SHPK.
Sipas informacioneve paraprake, menjëherë pas përfundimit të mbledhjes, ka shpërthyer një përplasje mes ortakëve. Raportohet se Idajet Ismailaj, së bashku me djalin e tij Florid Ismailaj dhe disa persona të afërt me ta, kanë dhunuar fizikisht dhe kanë kërcënuar Sokol Agalliun, djalin e ortakut tjetër të kompanisë.
Burime pranë çështjes bëjnë me dije se konflikti lidhet me akuza për përvetësim fondesh dhe prona. Sipas pretendimeve të ngritura nga Agalliu, Ismailaj dhe djali i tij akuzohen për marrjen e 500 milionë lekëve nga fondet e kompanisë, si dhe për përvetësimin e një sipërfaqeje prej 750 metrash katrorë në projektin “Manastiri Resort”.
Pas incidentit, Sokol Agalliu është dërguar për trajtim mjekësor në një spital privat në Tiranë. Burimet raportojnë se ai ka marrë dëmtime në trup dhe në kokë, ndërsa gjendja e tij shëndetësore paraqitet serioze.
Ngjarja pritet të hetohet nga autoritetet ligjzbatuese, ndërsa policia pritet të marrë në pyetje personat e përfshirë për zbardhjen e plotë të rrethanave të konfliktit.r.k
