Opozita ka reaguar pas dekoratës që i është dhënë nga Edi Rama ish-deputetit të PS-së në Durrës, Jurgis Çyrbja, i cili është dënuar për strehimin e vrasësit Altin Hajri dhe për nxjerrje sekretesh.
Kreu i PD, Sali Berisha shkruan se, tani motoja e re e Edi Ramës dhe PS-së është vdekje ligjit dhe nder krimit.
“Edi Rama i dorëzoi sot, me dorën e Sekretarit të Përgjithshëm të PS-së, dekoratën e mirënjohjes të dënuarit nga drejtësia si bashkëpunëtor dhe informator i vrasësit Altin Hajri, ish-deputetit të PS-së, Çyrbja. Dokumentet zyrtare provonin se Çyrbja informonte Hajrin në kërkim për çdo lëvizje të policisë në zonë”, shkruan Berisha.
Çyrbja u arrestua në tetor të vitit 2024 dhe u dënua me 3 vite burg për veprat penale të ‘korrupsionit aktiv’, ‘përkrahjes së autorit të krimit’ dhe ‘tregimit të sekretit shtetëror’. Ai doli nga burgu në shkurt të vitit 2025 dhe, ditën e konferencës ndërqeveritare të BE-së, Edi Rama i dorëzoi atij dekoratën e ‘Mirënjohjes’ apo të ‘Fisnikërisë së Qytetit’. m.k
