Dhjetëra mijëra qytetarë dolën në rrugët e Madridit të shtunën për të protestuar kundër kryeministrit spanjoll Pedro Sánchez, duke kërkuar dorëheqjen e tij pas skandaleve të fundit të korrupsionit që kanë tronditur qeverinë socialiste.
Protesta u shoqërua me tensione dhe përplasje me policinë pranë Pallatit Moncloa, rezidencës zyrtare të Sanchez. Sipas autoriteteve spanjolle, të paktën shtatë efektivë policie mbetën të plagosur, ndërsa tre persona u arrestuan pasi një grup protestuesish tentoi të çante kordonin e sigurisë.
Pamjet e transmetuara nga mediat në Spanjë treguan forcat e policisë duke neutralizuar dhe shoqëruar disa persona të maskuar në zonën pranë rezidencës së kryeministrit. Protestuesit mbanin pankarta me slogane kundër qeverisë socialiste, ndërsa gjatë “Marshit për Dinjitet” u valëvitën flamuj kombëtarë spanjollë.
Në protestë morën pjesë edhe figura të opozitës nga Partia Popullore dhe partia e ekstremit të djathtë Vox.
Klima politike në Spanjë është tensionuar më tej pas njoftimit se ish-kryeministri socialist José Luis Rodríguez Zapatero po hetohet për akuza që lidhen me trafik influence dhe pastrim parash. Zapatero, i konsideruar aleat i afërt i Sanchez, ka mohuar akuzat.
Ndërkohë, vetë Sanchez është përballur edhe më herët me presion politik, pasi në vitin 2024 autoritetet nisën një hetim ndaj bashkëshortes së tij, Begoña Gómez. Kryeministri spanjoll i ka cilësuar hetimet si sulme të motivuara politikisht nga grupet e ekstremit të djathtë.
Sa i përket pjesëmarrjes në protestë, organizatorët pretenduan se në marshim morën pjesë rreth 80 mijë persona, ndërsa qeveria lokale në Madrid raportoi një shifër më të ulët, rreth 40 mijë protestues.a.b
