Kryeministri Edi Rama ka reaguar përmes një rapsodie pas miratimit të raportit të ndërmjetëm të IBAR ndërsa nuk ka shprehur asnjë konsideratë për faktin se opozita përmes rezolutës në Parlament zgjidhi ngërçin në COLEA, komisionin e vlerësimit të IBAR.
“Thanë negociatat u bllokuan/
Thanë Shqipëria u ndëshkua/
Thanë Europa u zgjua/
dhe narkoregjimi u zbulua”,
rapsodon Rama, duke shtuar se opozita u lëshua rrugëve me molotovë dhe nëpër Europë me thasë balte e llumi” për të dëmtuar imazhin e vendit.
Sipas kreut të qeverisë, kundërshtarët politikë humbën përsëri ndërsa Shqipëria fitoi sërish.
Rama e cilësoi procesin e integrimit si një histori suksesi që sipas tij po ndërtohet me vizion, punë dhe përkushtim ndërsa shprehu mirënjohje për ekipin negociator, institucionet dhe qytetarët që mbështesin rrugën europiane të vendit.
“Kjo është një tjetër ditë krenarie për Shqipërinë, për skuadrën tonë të madhe, për shumicën parlamentare, për qeverinë, për institucionet e pavarura dhe për të gjithë ata që përfaqësojnë Shqipërinë në tryezën e negociatave për Shqipërinë 2030 në BE”, deklaroi kryeministri.
Në fund të reagimit të tij, Rama falënderoi qytetarët për mbështetjen dhe e mbylli mesazhin me thirrjen: “Forca Shqipëria!”.
