Raporti i IBAR, është miratuar në Grupin e Punës për Zgjerimin dhe vendet negociuese (COELA) pa asnjë kundërshtim nga shtetet anëtare, raporruan sot mediat në Tiranë.
Sipas përgjigjes zyrtare të Këshillit të Bashkimit Europian për gazetaren Fjorela Beleshi, dokumenti tashmë do të kalojë për miratim formal në COREPER, organi që përfaqëson ambasadorët e vendeve anëtare të BE-së.
“Drafti i qëndrimit të përbashkët të përkohshëm të BE-së (EUCP, bazuar në IBAR) sapo është miratuar në COELA pa asnjë kundërshtim të mëtejshëm nga shtetet anëtare. Hapi i radhës është kalimi i tij nesër pasdite për miratim tek ambasadorët e BE-së në COREPER, përpara se Konferenca Ndërqeveritare (IGC) të konfirmohet zyrtarisht”, thuhet në reagimin e Këshillit të BE-së.
Më herët, gazetarja Fjorela Beleshi raportoi nga Brukseli se të gjitha vendet anëtare kishin dhënë dakordësinë për vijimin e procedurës së miratimit të IBAR-it dhe kalimin e dosjes në COREPER II.
Sipas raportimit, pas këtij hapi pritet të konfirmohet zyrtarisht mbajtja e Konferencës Ndërqeveritare mes Shqipërisë dhe Bashkimit Europian më 26 maj.
“Ne takimin e sotëm, të gjitha vendet kanë dhënë dritën jeshile për të vijuar me miratimin e IBAR-it dhe kalimin e dosjes në Coreper II, i cili sanksionon formalisht mbajtjen e Konferencës Ndërqeveritare më 26 maj”, raportoi Beleshi.
Ky zhvillim konsiderohet një hap i rëndësishëm në rrugën e Shqipërisë drejt anëtarësimit në Bashkimin Europian, në një moment kur procesi i negociatave ka qenë në fokus të debatit politik dhe diplomatik në Bruksel.a.b
