Kreu i Partisë Demokratike, Sali Berisha, deklaroi se procesi i integrimit europian të Shqipërisë është plagosur rëndë nga ajo që ai e cilësoi si korrupsion dhe abuzime të qeverisë së Edi Rama dhe zyrtarëve të lidhur me AKSHI-n.
Në një deklaratë për mediat, Berisha akuzoi Ramën, Belinda Balluku dhe drejtues të lidhur me AKSHI-n se kanë dëmtuar seriozisht procesin e negociatave të Shqipërisë me Bashkimin Europian.
Berisha tha se raporti për Shqipërinë është ndryshuar dy herë dhe është pasuruar me kërkesa shtesë nga disa vende anëtare të BE-së, çka tregon shqetësimet e partnerëve europianë për situatën në vend.
Berisha tha se konferenca ndërqeveritare, e cila duhej të ishte zhvilluar që në muajin mars dhe më pas në prill, është shtyrë për shkak të rezervave të disa shteteve anëtare.
“Procesi i integrimit të Shqipërisë në BE është plagosur rëndë nga vjedhjet e Edi Ramës, Lubi Ballukut, Lindave të AKSHI-t dhe akte të tjera”, u shpreh Berisha.
Megjithatë, kreu i PD theksoi se opozita mbështet plotësisht procesin e integrimit europian, duke e konsideruar atë një domosdoshmëri gjeopolitike për Shqipërinë.
“PD mbështet plotësisht procesin e integrimit, qoftë vetëm për shkak të kriterit gjeopolitik. Shqipëria e ka vendin në familjen europiane”, deklaroi ai.
Berisha shtoi se Partia Demokratike do të vijojë të denoncojë problematikat që pengojnë përmbushjen e kritereve të Bashkimit Europian dhe u zotua se opozita do të përdorë të gjitha mjetet për të kërkuar përmbushjen e standardeve të kërkuara nga BE-ja. a.b
