Një ditë pas deklaratave të kreut të Partia Demokratike e Shqipërisë, Sali Berisha, ndaj ambasadorit të Bashkimi Europian në Shqipëri, Silvio Gonzato, ka ardhur reagimi i diplomatëve të vendeve anëtare të BE-së të akredituar në vend.
Përmes një deklarate të përbashkët, të publikuar në rrjetet sociale nga ambasadori i Qipro në Athinë, Stavros Avgoustides, diplomatët europianë shprehen se qëndrojnë të bashkuar në mbështetje të ambasadorit Gonzato dhe ekipit të tij, ndërsa i cilësojnë kritikat ndaj tyre si të pajustifikuara dhe të papranueshme.
“Në dritën e kritikave të pajustifikuara dhe të papranueshme ndaj Bashkimit Europian dhe përfaqësuesve të tij, ambasadorët e BE-së të akredituar në Shqipëri nxjerrin deklaratën e mëposhtme: Deklaratë e përbashkët e ambasadorëve të BE-së të akredituar në Shqipëri – 9 maj 2026. Në Ditën e Europës, ne qëndrojmë të bashkuar në mbështetje të Ambasadorit të BE-së dhe ekipit të tij, dhe rikonfirmojmë besimin tonë të plotë në profesionalizmin, integritetin dhe shërbimin e tyre të përkushtuar”, thuhet në deklaratë.
Reagimi vjen pasi një ditë më parë Berisha, gjatë një bashkëbisedimi online me qytetarët, akuzoi ambasadorin Gonzato se në Bruksel paraqet qëndrime të pavërteta për opozitën shqiptare.
“Përsa i përket ambasadorit aktual, unë kam shprehur se ky sillet sikur të ishte ambasador i Edi Ramës. Mbase ky zotëri, në mënyrë të vërtetuar, ka transmetuar në Bruksel trillimet më të pavërteta ndaj opozitës, sikur opozita nuk është për integrimin. Për të mos treguar shumë gjëra të tjera. Çfarëdo që të bëjmë ne, ambasadori i BE në Tiranë, në Bruksel sillet në mënyrë absolute sikur të jetë ambasadori i Edi Ramës në Bruksel”, deklaroi Berisha.
Kreu demokrat u bëri gjithashtu thirrje vendeve anëtare të BE-së dhe parlamenteve të tyre që të informohen drejtpërdrejt për situatën politike në Shqipëri përmes misioneve faktmbledhëse.a.b
