Policia e Shtetit ka finalizuar disa operacione në të gjithë vendin, duke arrestuar 2 persona të shpallur në kërkim kombëtar, ndërsa 9 shtetas të tjerë janë shpallur në kërkim për vepra të ndryshme penale.
Sipas njoftimit zyrtar, një tjetër operacion është zhvilluar në bashkëpunim me autoritetet britanike, ku është bërë ekstradimi nga Mbretëria e Bashkuar i një shtetasi të dënuar me 2 vite burg nga Gjykata e Tiranë për armëmbajtje pa leje.
Në kuadër të luftës kundër narkotikëve, policia ka evidentuar 3 raste në zona të ndryshme të vendit, ku 3 autorë janë proceduar penalisht në gjendje të lirë.
Gjatë kontrolleve në terren janë zbuluar dhe asgjësuar gjithashtu një numër i konsiderueshëm fidanësh dhe bimësh narkotike, ndërsa uniformat blu kanë sekuestruar edhe një sasi të vogël lënde të dyshuar narkotike të llojit kanabis.
Policia bën me dije se kontrollet dhe operacionet kundër personave në kërkim dhe veprimtarive të paligjshme do të vijojnë në të gjithë territorin e vendit.
