Në Tiranë nisi sot sesioni hapës i Kongresi Botëror i Ligjit, një aktivitet i rëndësishëm ndërkombëtar që do të zhvillohet vitin e ardhshëm në Shqipëri, me pjesëmarrjen e figurave të njohura të drejtësisë dhe institucioneve ligjore nga mbarë bota.
Ky organizim i nivelit të lartë po zhvillohet nga Shoqata Botërore e Juristëve në bashkëpunim me Ministria e Drejtësisë e Shqipërisë. Në aktivitet morën pjesë përfaqësues të qeverisë shqiptare, gjyqtarë ndërkombëtarë, akademikë dhe ekspertë të njohur të fushës së drejtësisë, mes tyre presidenti i Shoqatës Botërore të Juristëve, Javier Cremades, si dhe ish-komisionerja europiane për Drejtësinë dhe të Drejtat Themelore, Viviane Reding.
I pranishëm në këtë aktivitet ishte edhe kryeministri Edi Rama, i cili në fjalën e tij vuri theksin te reforma në drejtësi dhe rrugëtimi i Shqipërisë drejt ndërtimit të një shteti të së drejtës.
Në fjalën e tij, kreu i qeverisë solli si shembull respektimin e rregullave në trafik për të shpjeguar rëndësinë e sistemit dhe institucioneve në zbatimin e ligjit. Sipas tij, sjellja e qytetarëve nuk përcaktohet nga kombësia apo historia, por nga funksionimi i sistemit shtetëror.
Unë e kam sjellë dikur një shembull dhe po e risjell këtu, kur diskutohej vendosja e rripit të sigurimit në Shqipëri. Vendosja e rripit të sigurimit në trafik ishte diçka jashtëzakonisht e vështirë për t’u perceptuar nga shqiptarët dhe ishte një fakt që e dallonte shqiptarin këtu me shqiptarin në Gjermani. Asnjë shqiptar në Gjermani nuk e konceptonte dot që të ndizte makinë pa vënë rripin, por shumë pak shqiptarë e konceptonin që të vinin nga Gjermania këtu dhe të mbanin rrip. Dhe një ditë, një ambasador i Gjermanisë me thotë: “Çudi e madhe, ju shqiptarët as këtë gjë nuk e mësoni shpejt’’.
I thashë: “dëgjo, ty do të të vijë keq po unë kam parë punonjës të ambasadës gjermane pa rrip sigurie në Shqipëri’’. Dhe kjo është e vërtetë sepse nuk është njeriu, nuk është kombësia e tij, nuk është historia prej nga një popull vjen që përcakton sjelljen e individit në raport me ligjin. Është sistemi.
Gjermanët në Shqipëri, bile i gëzoheshin mosvënies së rripit të sigurisë. Shqiptarët në Gjermani as nuk e imagjinonin që të mos vinin rrip sigurie dhe ky është hendeku që ne duhet të mbushim me Reformën në Drejtësi dhe me ndërtimin e institucioneve në tërësi. Krijimi i një sistemi që e bën pastaj të pamundur arbitraritetin i cili edhe sot që flasim, është i kudondodhur në sistemin tonë shtetëror përfshirë edhe sistemin e drejtësisë dhe e bën të pamundur krijimin e niveleve të ndryshme në raport me kërkesën e ligjit.
“Kjo është sfida që ne duhet të mbushim me Reformën në Drejtësi dhe me ndërtimin e institucioneve në tërësi. Krijimi i një sistemi që e bën të pamundur arbitraritetin”, u shpreh Rama.
Kryeministri nënvizoi gjithashtu rolin e Bashkimi Europian në procesin e reformimit të drejtësisë në Shqipëri, duke e cilësuar BE-në si “burimin më të madh dhe të vetëm në botë për të mësuar si ndërtohen institucionet”.
Sipas Ramës, procesi i integrimit europian dhe negociatat me Brukselin përfaqësojnë një transferim të rëndësishëm dijeje për Shqipërinë, që ndihmon në forcimin e shtetit ligjor dhe barazisë para ligjit.
Ai deklaroi se shumica qeverisëse mbetet e vendosur për të mos lejuar kthim pas në reformën në drejtësi dhe për të garantuar pavarësinë e sistemit të ri të drejtësisë.
