Ish-deputeti demokrat Ervin Salianji ka lëshuar akuza të forta ndaj kreut të Partisë Demokratike, Sali Berisha, duke e fajësuar për gjendjen e opozitës dhe humbjet elektorale të viteve të fundit, pasi Salianji nuk u përfshi në garën për kryetar të PD që do mbahet me 23 maj.
Në një reagim publik, Salianji e cilësoi mënyrën se si Berisha po drejton Partinë Demokratike si “standard mizerabël”, ndërsa tha se kjo tregon mungesë përgjegjësie historike ndaj demokratëve që, sipas tij, prej 13 vitesh ndodhen në opozitë.
Ai akuzoi Berishën dhe rrethin e tij se po abuzojnë me besnikërinë e demokratëve, duke ushtruar presion moral ndaj tyre që të heshtin përballë zhvillimeve në parti.
Salianji ngriti disa pyetje lidhur me humbjen në zgjedhjet e 11 majit 2025, duke kërkuar përgjegjësi për listat e kandidatëve, programin elektoral dhe drejtimin e fushatës.
“Dhe pyetja më e rëndësishme: si do të fitojë Partia Demokratike?”, shprehet ai, duke shtuar se edhe mbështetësit më besnikë e dinë se me Berishën në krye, PD nuk mund të vijë në pushtet.
Sipas Salianjit, çdo ditë që Berisha qëndron në krye të selisë blu është humbje për opozitën dhe për vendin, ndërsa e cilësoi atë si të konsumuar, të izoluar dhe të paaftë për të bashkuar opozitën.
Ai theksoi se nuk mund të kërkohet ndryshim në Shqipëri duke refuzuar ndryshimin brenda Partisë Demokratike, ndërsa kërkoi që PD të rikthehet në një parti gare, përfaqësimi dhe përgjegjësie. r.p
