Një ngjarje e rëndë është regjistruar këtë të martë në qendër të Athinë, ku një person i armatosur hapi zjarr në dy institucione publike, duke lënë pas disa persona të plagosur.
Sipas autoriteteve greke, sulmi i parë ndodhi në një zyrë të sigurimeve shoqërore EFKA, në zonën e Kerameikos. I dyshuari, një burrë 89-vjeçar, i armatosur me armë gjahu, u ngjit në katin e katërt të godinës dhe hapi zjarr pasi i kërkoi një punonjësi të ulej. Nga të shtënat mbeti i plagosur në këmbë një tjetër punonjës.
Pas incidentit të parë, autori u largua nga vendngjarja dhe dyshohet se kreu një tjetër sulm në katin përdhes të një gjykate në një zonë tjetër të qendrës së Athinë. Nga ky episod u raportuan disa të plagosur.
Pamjet e transmetuara nga mediat greke treguan ambulanca që transportonin të lënduarit drejt spitaleve, ndërsa policia vijon operacionin për kapjen e autorit, i cili mbetet në arrati.
Sipas raportimeve paraprake, i dyshuari ka hedhur në tokë disa zarfe me dokumente, duke pretenduar se ato lidhen me motivet e sulmit, megjithatë shkaqet e ngjarjes mbeten ende të paqarta.
Dhuna me armë zjarri në Greqi konsiderohet relativisht e rrallë, për shkak të ligjeve të rrepta për mbajtjen e armëve.
