Ish-Presidenti Ilir Meta ka mbërritur në sallën e gjyqit, ku është shfaqur në kafazin e xhamit, ndërsa ka përshëndetur të pranishmit me dy gishtat lart.
Gjatë hyrjes në seancë, teksa jashtë godinës ndodheshin mbështetës të tij, Meta ka bërë me duar simbolin e shqiponjës dhe është dëgjuar duke thënë: “Shqipëria e shqiptarëve”.
Ilir Meta u arrestua më 21 tetor 2024. Ai dhe ish-deputetja Monika Kryemadhi dyshohen se, në bashkëpunim me njëri-tjetrin dhe me funksionarë të tjerë shtetërorë, kanë përdorur postet publike ndër vite për të favorizuar kompani private, si edhe në çështje që lidhen me lobime në United States dhe transaksione pasurish, me qëllim përfitimin e shumave të konsiderueshme financiare, të cilat dyshohet se nuk janë deklaruar pranë institucioneve përkatëse.
Ndaj Kryemadhit, SPAK ka ngritur hetime për veprat penale të pastrimit të parave, korrupsionit dhe mosdeklarimit të të ardhurave. Më 23 tetor, gjykata la në fuqi masën “detyrim për t’u paraqitur në policinë gjyqësore” ndaj saj, si edhe ndaj të hetuarës Ema Çoku për pastrim parash.
Ndërkohë, për Piro Xhixho, i hetuar për korrupsion pasiv, masa e sigurisë “arrest në shtëpi” u zëvendësua me “detyrim për t’u paraqitur në policinë gjyqësore”. Të tre personat nën këtë masë duhet të paraqiten një herë në muaj pranë zyrave të Policisë Gjyqësore.
