Një person qëlloi me armë në darkën e Trump me korrespondentët e Shtëpinë së Bardhë, presidenti u evakuua me urgjencë nga salla
Një incident i rëndë tronditi mbrëmjen e së shtunës eventin tradicional të Darkës së Korrespondentëve të Shtëpisë së Bardhë në Washington, D.C., ku një person i armatosur hapi zjarr pranë perimetrit të sigurisë, ndërsa presidenti Donald Trump u evakuua menjëherë nga salla.
Ngjarja ndodhi pranë hotelit Washington Hilton, ku po zhvillohej ceremonia me rreth 2,500 të ftuar, mes tyre zyrtarë të lartë amerikanë, gazetarë dhe personalitete të njohura. Sipas autoriteteve, i dyshuari tentoi të depërtonte me forcë në një pikë kontrolli sigurie, përpara se të shkëmbente zjarr me agjentët e Shërbimit Sekret.
Personi i arrestuar është identifikuar si Cole Thomas Allen. Policia bëri të ditur se ai ishte i armatosur me një pushkë gjahu, një pistoletë dhe disa thika.
Gjatë përplasjes, një agjent i Shërbimit Sekret u godit, por shpëtoi pa lëndime falë jelekut antiplumb. Më pas, i dyshuari u neutralizua, u rrëzua në tokë dhe u vu në pranga nga forcat e rendit.
Autoritetet amerikane deklaruan se 31-vjeçari besohet të ketë vepruar i vetëm, ndërsa motivet e sulmit mbeten ende të paqarta. Sipas mediave amerikane, ai punonte si mësues me kohë të pjesshme dhe zhvillues videolojërash në Kaliforninë Jugore.
Pas incidentit, Trump reagoi duke lavdëruar reagimin e shpejtë të Shërbimit Sekret dhe policisë, duke e cilësuar ndërhyrjen e tyre “të guximshme” dhe “fantastike”.
Ngjarja shkaktoi panik dhe ndërprerje të menjëhershme të aktivitetit, ndërsa hetimet vijojnë për të zbardhur plotësisht rrethanat e sulmit.a.b
