Deputeti i Partia Socialiste e Shqipërisë, Erion Braçe, ka reaguar lidhur me aludimet për kandidimin e tij për Bashkinë e Tiranë, duke sqaruar se nuk ka zhvilluar asnjë bisedë me kryeministrin Edi Rama mbi këtë çështje.
Përmes një postimi në rrjetet sociale, Braçe theksoi se kandidimi i tij nuk është nxitur nga Rama dhe nuk lidhet me asnjë marrëveshje apo favor politik.
Sipas deputetit socialist, qëndrimi i tij mbështetet te parimet e brendshme të Partisë Socialiste dhe nevoja për rikthimin e proceseve demokratike në parti, ku vendimmarrja duhet të vijë përmes votës së anëtarësisë dhe jo përmes emërimeve të njëanshme.
Braçe u shpreh se prej vitesh në PS gara, merita dhe vota janë zëvendësuar me “njoftime në mur”, duke kritikuar mënyrën e përzgjedhjes së drejtuesve në nivele të ndryshme.
Ai sqaroi gjithashtu se ideja për të kandiduar është diskutuar më herët në strukturat e partisë, konkretisht në Asamblenë e PS-së në Njësinë 5, dhe është rezultat i kërkesave të qytetarëve dhe socialistëve të Tiranës me të cilët ka komunikuar.
Në reagimin e tij, Braçe theksoi se nuk synon të sulmojë Ramën apo individë të tjerë, por të ngrejë shqetësimet për mënyrën e drejtimit të qytetit.
Sipas tij, Tirana prej një viti nuk po vetëqeveriset dhe as po qeveriset siç duhet, ndërsa përballet me probleme në ligj, rregull dhe shërbime publike.
Deputeti socialist deklaroi se synimi i tij është reformimi i proceseve dhe rikthimi i shërbimit ndaj qytetarëve, duke shtuar se dëshiron të jetë “kryepunëtor” për qytetin dhe banorët e tij.a.b
