TIRANË – Një nga komeditë më të njohura të autorit të “Boeing Boeing” vjen sot për publikun shqiptar në Teatrin Eksperimental. “Sonte do darkojmë në shtrat” premton një mbrëmje plot humor, ritëm dhe situata të papritura.
Ngjarja nis me një plan në dukje të thjeshtë: një burrë dërgon gruan te nëna e saj dhe fton në shtëpi të dashurën për të festuar ditëlindjen. Por gjithçka ndërlikohet pas një telefonate të gabuar, duke sjellë në të njëjtën shtëpi tre çifte, secili me sekretet dhe qëllimet e veta—nga tradhtia te aventurat apo testet për marrëdhëniet.
Ajo që duhej të ishte një mbrëmje perfekte shndërrohet në një kaos komik, ku gënjeshtrat zbulohen njëra pas tjetrës. Keqkuptime, xhelozi dhe situata absurde krijojnë një zinxhir ngjarjesh që i vë personazhet përballë së vërtetës.
Me interpretime të gjalla, një qasje moderne dhe një ritëm që nuk të lë të marrësh frymë, kjo komedi konsiderohet një surprizë e këndshme për publikun. Një shfaqje që, sipas organizatorëve, nuk duhet humbur për asnjë arsye. r.k
