Partia Demokratike ka hedhur akuza të reja ndaj ministres Delina Ibrahimaj, duke e akuzuar për përfitime të dyshimta përmes fondeve publike.
Në një deklaratë për mediat, zëdhënësja për antikorrupsion në PD, Genta Vangjeli, tha se rreth 200 mijë euro nga fondet e Ministrisë së Kulturës dhe asaj të Turizmit janë përdorur për projektin “Delina n’Fest”, i cili në dokumente figuron si “Vjosa n’Fest”.
Sipas opozitës, ky projekt është realizuar nga shoqata “Tirana Ekspres”, ku vetë Ibrahimaj ka qenë e punësuar më herët, ndërsa bashkëshorti i saj ka përfituar të ardhura gjatë zbatimit të tij si drejtues.
PD pretendon se, paralelisht me ngritjen e Ibrahimajt në poste ministrore që prej vitit 2021, është rritur ndjeshëm edhe numri i bizneseve të lidhura me familjarët e saj, nga 2 në 7 subjekte, duke e cilësuar këtë si një model të përfitimit nga pushteti.
Demokratët rikujtojnë gjithashtu denoncime të mëparshme për biznese dhe një hotel në Qeparo, të regjistruar në emër të vjehrrit të ministres dhe të administruar nga bashkëshorti i saj.
Në deklaratë theksohet se, pavarësisht rolit aktual si ministre, Ibrahimaj vijon të mbështesë projekte dhe subjekte me të cilat ka pasur lidhje më herët.
PD e cilëson këtë rast si një “skandal” që, sipas saj, në një vend normal do të çonte në dorëheqje dhe hetim penal, ndërsa akuzon institucionet e drejtësisë për mungesë reagimi.
Në përfundim, opozita u bën thirrje qytetarëve të bashkohen në një protestë më 17 prill, për të kundërshtuar korrupsionin dhe, sipas saj, abuzimin me fondet publike. r.p
