Pas përfundimit të fjalimeve para godinës së Kryeministrisë, protestuesit vijuan sot në ditën e 109 marshimin në rrugët e Tiranës, duke u ndalur në disa pika të kryeqytetit.
Gjatë marshimit u dëgjuan thirrje kundër qeverisë dhe kryeministrit Edi Rama, mes tyre “Shqipëria kërkon revolucion”, “Ju erdhi fundi” dhe “Duam dorëheqje”.
Një nga ndalesat e protestuesve ishte Blloku i Sigurisë në zonën e Mine Pezës, ku mbahen qytetarët e ndaluar gjatë protestave. Protestuesit u solidarizuan me të ndaluarit, duke thirrur “Nuk jeni vetëm” dhe “Çuna, çuna, jemi këtu, gjithë Shqipëria është me ju”.
Nga jashtë ambienteve të Bllokut të Sigurisë u dëgjuan gjithashtu thirrjet “Rama në burg” dhe “Belinda në burg”, ndërsa protestuesit kërkuan lirimin e qytetarëve të ndaluar.
Më pas, marshimi vijoi në drejtim të Kuvendit të Shqipërisë. Organizatorët kanë paralajmëruar vijimin e aksionit të mosbindjes civile dhe u kanë bërë thirrje qytetarëve që të bashkohen nesër para Kuvendit në orën 10:00.
Protestuesit kërkuan dorëheqjen e kryeministrit Edi Rama dhe të qeverisë, duke e akuzuar atë për përgjegjësi për një sërë çështjesh që ata i konsiderojnë skandale dhe afera.
Gjatë marshimit u përsëritën edhe thirrjet “Arrestoni Ramën, lironi shqipet” dhe “Shqipëria është e shqiptarëve”.
Protesta u mbyll te busti i Komandantit Adem Jashari, ndalesë që organizatorët e kanë cilësuar me rëndësi simbolike në lidhje me Kosovën dhe Ushtrinë Çlirimtare të Kosovës në mbështetje të drejtuesve të UÇK që u dënuan sot me dhjetra vite burg nga Gjykata Speciale.m.k
