Policia e Tiranës ka finalizuar operacionin e koduar “Penaliteti”, duke vënë në pranga një 26-vjeçar të dyshuar për disa raste vjedhjeje dhe tentativa vjedhjeje të ndodhura gjatë muajit prill në kryeqytet.
Sipas uniformave blu, operacioni u zhvillua nga shërbimet e Komisariatit të Policisë Nr. 6, pas kallëzimeve të disa qytetarëve dhe administratorëve të bizneseve për vjedhje të pronës dhe pasurisë.
Si rezultat i veprimeve hetimore, policia arriti të lokalizojë dhe arrestojë autorin e dyshuar, shtetasin me iniciale A. H., 26 vjeç.
Nga hetimet paraprake dyshohet se i riu, gjatë muajit prill 2026, ka vjedhur shuma parash dhe produkte në katër subjekte tregtare, si dhe ka tentuar të kryejë vjedhje në një banesë dhe në një biznes tjetër.
Gjatë verifikimeve të mëtejshme, policia ka konstatuar se 26-vjeçari ishte në masën e sigurisë “Arrest në shtëpi”, të vendosur më herët ndaj tij për veprën penale “Dhuna në familje”.
Autoritetet bëjnë me dije se hetimet vijojnë për të zbuluar nëse i dyshuari është i përfshirë edhe në raste të tjera vjedhjesh.
Materialet procedurale i janë referuar Prokurorisë së Tiranës për veprime të mëtejshme ligjore.
