Një koment i një qytetari nga Kosova ka tërhequr vëmendje në rrjetet sociale, pasi ai ka vënë në dyshim fotografitë e Tokës të realizuara nga ekuipazhi i misionit hapësinor Artemis II.
Pas publikimit të imazheve nga NASA në faqen zyrtare në Facebook, ku shfaqen pamje të Tokës të shkrepura nga afërsia e Hënës, Nexhi Krasniqi ka reaguar duke i kontestuar ato.
Në komentin e tij, ai ka ngritur pyetjen pse në fotografi nuk duken yjet, duke shprehur dyshimin se imazhet mund të jenë krijuar me inteligjencë artificiale.
“Pse nuk po duken yjet nga kjo pozitë? Dyshoj që është krijuar nga inteligjenca artificiale!”, ka shkruar ai në reagimin e tij.
Komenti ka marrë përgjigje nga vetë NASA, e cila ka sqaruar arsyen pse në këto fotografi nuk shfaqen yjet.
Sipas agjencisë amerikane të hapësirës, yjet janë shumë më të zbehtë në krahasim me ndriçimin e fortë të Hënës, e cila ndodhet më afër dhe reflekton shumë më tepër dritë.
“Nuk mund të shohim yje në këto imazhe, sepse ato duken shumë më të zbehta krahasuar me Hënën. Kamerat mund të kapin vetëm një gamë të kufizuar ndriçimi midis pjesëve më të ndritshme dhe më të errëta të skenës”, ka sqaruar NASA në përgjigjen e saj.
