Prokuroria e Posaçme Kundër Korrupsionit dhe Krimit të Organizuar (SPAK) ka ngritur dyshime të forta se procedura për dhënien me koncesion të aeroportit të Vlorës është shoqëruar me shkelje të barazisë në tender dhe se kompania fituese mund të ketë qenë e paracaktuar.
Sipas gazetares Klodiana Lala, e cila raportoi për News24, hetimi që ka zgjatur rreth një vit është drejtuar nga prokurori Klodian Braho. Në kuadër të këtij hetimi janë thirrur dhe janë marrë në pyetje anëtarë të komisionit të vlerësimit të ofertave, ndërsa disa prej tyre janë vënë nën akuzë për veprën penale të shkeljes së barazisë në tendera.
Nga hetimet paraprake dyshohet se gjatë procesit të vlerësimit të kompanive që garonin për koncesionin është cënuar parimi i barazisë, ndërsa kompania fituese mund të ketë qenë e paracaktuar që në fillim të garës.
Burime për News24 bëjnë me dije se SPAK u ka komunikuar akuzën për shkelje të barazisë në tendera dy anëtarëve të komisionit të vlerësimit të ofertave, pasi gjatë hetimeve janë konstatuar shkelje që dyshohet se janë kryer në bashkëpunim.
Megjithëse hetimi është mbajtur në një nivel të lartë konfidencialiteti, burimet thonë se kjo akuzë është komunikuar edhe për shkak të afatit të parashkrimit të veprës penale, ndërsa paralelisht po hetohen edhe dyshime për vepra të tjera më të rënda penale, si korrupsioni apo pastrimi i parave.
Koncesioni për aeroportin e Vlorës u vu nën hetim nga SPAK në korrik të vitit të kaluar, pas një kërkese të depozituar nga një qytetar, identiteti i të cilit nuk është bërë publik.
Ndërkohë, projekti është objekt hetimi edhe nga Prokuroria e Tiranës, për shkak të një konflikti mes dy prej aksionerëve kryesorë të projektit, biznesmenëve Begjet Pacolli dhe Valon Ademi.
