Shtatë punonjës të Policisë së Shtetit janë pezulluar nga detyra, në kuadër të masave për forcimin e luftës kundër kultivimit të kanabisit dhe rritjen e përgjegjësisë së strukturave policore.
Të pezulluarit janë: Komisar Altin Gusho, Komisar Danjel Kacaniku, Nënkomisar Sefer Dushku, Inspektor Muharrem Zylyfi, Nënkomisar Bilbil Lita, Komisar Denis Sinani dhe Inspektor Arben Koseni.
Masat disiplinore u bënë të ditura nga vetë Drejtori i Përgjithshëm i Policisë së Shtetit, Skënder Hita, gjatë një mbledhjeje të zhvilluar paraditen e sotme në Drejtorinë e Përgjithshme të Policisë së Shtetit, ku ishin të pranishëm të gjithë drejtorët vendorë dhe drejtuesit e Policisë Kufitare.
Gjatë takimit, Hita u ka kërkuar drejtuesve të policisë në të gjithë vendin të marrin masa të menjëhershme dhe të forta për parandalimin dhe goditjen e kultivimit të kanabisit, duke theksuar se nuk do të tolerohet asnjë neglizhencë apo përfshirje e punonjësve të policisë në aktivitete të paligjshme.
Ai ka kërkuar gjithashtu një qëndrim të rreptë ndaj çdo efektivi që bëhet palë në veprimtari kriminale apo që nuk përmbush detyrat funksionale, duke paralajmëruar masa të menjëhershme disiplinore në raste të tilla.
