Një ngjarje e rëndë familjare është parandaluar nga Policia në Himarë, pasi një 35-vjeçar kishte mbajtur të mbyllur në banesë prindërit e tij dhe i kërcënonte me thikë.
Sipas të dhënave, shtetasi Spiro Dhimaleksi, në gjendje të rënduar psikologjike, kishte izoluar në një dhomë prindërit e tij, përkatësisht 60 dhe 65 vjeç, duke i kërcënuar se do t’i vriste.
Pas njoftimit, në vendngjarje mbërritën menjëherë forcat e policisë, të cilat nisën negociatat me 35-vjeçarin. Sipas autoriteteve, ai kishte probleme të shëndetit mendor.
Pas më shumë se një ore negociatash, një efektiv policie që është banor i zonës arriti të komunikojë drejtpërdrejt me të riun, duke ndikuar në uljen e tensionit.
Në momentin e ndërhyrjes së policisë, 35-vjeçari tentoi të dëmtonte veten me mjetin prerës, duke pësuar plagë në zonën e barkut. Efektivët ndërhynë menjëherë, e neutralizuan dhe i hoqën thikën, duke bërë të mundur shpëtimin e prindërve pa lëndime.
Më pas, 35-vjeçari u shoqërua fillimisht në Komisariatin e Policisë Himarë dhe më pas në Vlorë, ku mori ndihmën mjekësore në spitalin rajonal dhe u referua për trajtim në shërbimet psikiatrike.
Ndërkohë, prindërit e tij janë marrë në pyetje nga autoritetet për të sqaruar plotësisht rrethanat e ngjarjes. Policia thekson se falë ndërhyrjes profesionale dhe negociatave të kujdesshme u arrit të parandalohej një tragjedi e mundshme.
