Ka ndërruar jetë edhe e dyshuara për vrasjen me armë zjarri të Ilaz Brahimi dhe të afërmes së saj Miradije Gashi, ngjarje e ndodhur në Podujevë, Kosovë.
30-vjeçarja Ardita Gashi, e dyshuar si autore e krimit, kishte qëlluar edhe veten me armë zjarri pas ngjarjes dhe prej mbrëmjes së djeshme ndodhej në spital në gjendje të rëndë. Sipas raportimeve, ajo ka ndërruar jetë sot si pasojë e plagëve të marra.
Ngjarja e rëndë ndodhi një natë më parë në Podujevë. Sipas informacioneve paraprake, 30-vjeçarja dyshohet se qëlloi fillimisht me armë zjarri 45-vjeçarin Ilaz Brahimi, ndërsa ai ndodhej në automjetin e tij.
Më pas, ajo është drejtuar drejt banesës së nuses së xhaxhait të saj, ku ka qëlluar edhe Miradije Gashi, 73 vjeçe. E moshuara u transportua në spital, por nuk arriti t’u mbijetojë plagëve dhe ndërroi jetë gjatë ditës së sotme.
Pas kryerjes së këtyre veprimeve, 30-vjeçarja qëlloi edhe veten me armë zjarri, duke mbetur e plagosur rëndë deri në momentin kur ndërroi jetë në spital.
Autoritetet po vijojnë hetimet për të zbardhur plotësisht rrethanat dhe motivet e kësaj ngjarjeje të rëndë. Sipas dyshimeve paraprake, 30-vjeçarja mund të ketë pasur një lidhje sentimentale me viktimën 45-vjeçare.
