Kreu i PD, Sali Berisha ka paralajmëruar përshkallëzim të protestave të opozitës në të gjithë vendin, duke theksuar se reagimi qytetar do të shtrihet në çdo zonë ku ka pakënaqësi ndaj qeverisë.
I pyetur nga gazetarja Marsi Korreshi nëse protestat e opozitës do të shtrihen përtej Tiranës dhe në qytete të tjera të Shqipërisë, Berisha u shpreh se reagimi do të jetë i përhapur në të gjithë vendin.
“Do të ketë kudo protesta. Aty ku është pakënaqësia do të ngrihet protesta. Regjimi do të përballet në të katër anët e vendit me qëndresën e fuqishme popullore”, deklaroi ai.
Në vijim të qëndrimit të tij, Berisha theksoi se opozita do të vazhdojë aksionin politik deri në largimin e qeverisë nga pushteti, duke e cilësuar atë si një organizatë pa legjitimitet.
Ai akuzoi mazhorancën se ka dalë nga një proces zgjedhor që, sipas tij, ishte farsë dhe se gjatë qeverisjes janë vjedhur miliarda euro. Sipas kreut të opozitës, situata është rënduar edhe më shumë nga bllokimi i drejtësisë.
Berisha tha se opozita e sheh veten si përfaqësuese të interesave të qytetarëve shqiptarë, pavarësisht bindjeve të tyre politike, duke theksuar se beteja politike do të vijojë dhe do të intensifikohet.
“Nuk ka më paqe dhe stabilitet për hajdutët dhe narkozyrtarët shqiptarë deri në rikthimin e votës së lirë dhe të shtetit ligjor”, u shpreh ai. a.b
