Policia ka sekuestruar 41 kg e 350 gramë kokainë në Portin e Durrësit, me një vlerë tregu që përllogaritet rreth 2 milionë euro, raporton A2 CNN.
Operacioni është zhvilluar nga Sektori për Hetimin e Narkotikëve i DVP Durrës, në bashkëpunim me Drejtorinë Vendore për Kufirin dhe Migracionin Durrës dhe strukturat doganore të Portit të Durrësit, në kuadër të hetimeve për një rast të dyshuar trafikimi të lëndëve narkotike.
Sipas Policisë, kontrolli i imtësishëm është kryer në një kontejner me origjinë nga Brazili, i cili, sipas dokumentacionit, transportonte mish pule.
Gjatë kontrollit, në kapakët e jashtëm të kontejnerit janë gjetur 37 paketime me lëndë të dyshuar narkotike kokainë. Sasia totale rezultoi 41 kg e 350 gramë, ndërsa vlera e saj në treg përllogaritet rreth 2 milionë euro.
Kompania qe kishte porositur mish pule dhe ku u gjeten 41 kg kokaine i perket AMG food, Arben Goxhaj pronari DIMAL.
Strukturat hetimore të DVP Durrës vijojnë veprimet për dokumentimin e plotë ligjor të rastit, përcaktimin e origjinës dhe destinacionit të kokainës, si dhe identifikimin dhe kapjen e personave të përfshirë në këtë veprimtari kriminale.
Materialet procedurale i janë referuar Prokurorisë për veprime të mëtejshme.
