Një aksident i rëndë rrugor me pasojë dy viktima është regjistruar mbrëmjen e sotme në Vlorë.
Sipas informacionit paraprak të policisë, rreth orës 20:55, në aksin rrugor Vlorë–Kotë, në vendin e njohur si “Ura e Vodicës”, janë përfshirë në një përplasje dy automjete që drejtoheshin nga shtetasit me inicialet Adi Alushaj, rreth 30 vjeç, dhe Esat Brahimaj, rreth 40 vjeç.
Si pasojë e përplasjes së fortë, të dy drejtuesit e mjeteve kanë humbur jetën në vendngjarje. Ndërkohë, një pasagjer që udhëtonte në automjetin me drejtues shtetasin E. B., shtetasi A. B., rreth 40 vjeç, ka mbetur i plagosur rëndë.
I plagosuri është transportuar për ndihmë mjekësore, ndërsa autoritetet nuk kanë dhënë ende detaje të tjera për gjendjen e tij shëndetësore.
Në vendin e ngjarjes ndodhet grupi hetimor, i cili po punon për zbardhjen e plotë të rrethanave dhe për përcaktimin e shkakut të aksidentit.
