Deputeti i Partisë Demokratike, Belind Këlliçi, ka reaguar ndaj nismës së ndërmarrë nga kryetari i Gjykata e Lartë, Sokol Sadushi, për ndryshimin e praktikës mbi masat e sigurimit personal.
Sipas Këlliçit, kjo nismë mund të zbusë standardet e paraburgimit dhe ngre pikëpyetje për momentin dhe qëllimin real të saj. Në një reagim në rrjetet sociale, ai shprehet se në vend që sistemi i drejtësisë të forcojë luftën kundër korrupsionit, po hapet një debat që sipas tij rrezikon të dobësojë një nga instrumentet kryesore për parandalimin e abuzimit me pushtetin dhe prishjen e provave.
Deputeti demokrat thekson se është problematike që kjo iniciativë vjen nga një figurë për të cilën, sipas tij, në opinionin publik është përfolur për afërsi politike me kryetarin e Bashkisë së Tiranës, Erion Veliaj.
“Kur drejtësia dhe politika shfaqen kaq pranë njëra-tjetrës, çdo vendim i tillë vetëm sa forcon dyshimin dhe bindjen se sistemi po ndryshohet për t’i shërbyer pushtetit dhe korrupsionit, dhe jo qytetarëve. Drejtësia duhet të jetë mbi politikën, jo në shërbim të saj”, shprehet Këlliçi në reagimin e tij.
