Një incident i rëndë me armë zjarri është regjistruar mbrëmjen e sotme në qendër të Rrilës, në Lezhë. Si pasojë e të shtënave, ka mbetur i plagosur shtetasi Sokol Daci, rreth 30 vjeç. Sipas burimeve zyrtare, i riu ndodhet jashtë rrezikut për jetën dhe po trajtohet nga mjekët në spital.
Ngjarja ka ndodhur brenda një berberhane, ku dyshohet se ndaj tij është qëlluar me breshëri plumbash. Autori i dyshuar nuk është identifikuar ende dhe është larguar menjëherë nga vendngjarja.
Forca të shumta policie kanë mbërritur në zonë dhe po kryejnë veprimet hetimore për zbardhjen e plotë të rrethanave të ngjarjes, si dhe për identifikimin dhe arrestimin e autorit.
