Kryeministri Edi Rama u ka kërkuar përfaqësuesve të rrjeteve të supermarketeve që të ulin çmimet, duke argumentuar se niveli i tyre në Shqipëri është më i lartë se në vende të tjera. Rama e bëri kërkesën gjatë një takimi me përfaqësuesit e rrjeteve të supermarketeve, ku foli për çmimet e produkteve dhe ndikimin e zhvlerësimit të euros dhe inflacionit të importuar.
“Po flas shumë hapur, shumë drejtpërdrejtë, s’kam asnjë arsye të kem asgjë personale me askënd. Nuk mendoj që po kërkojmë ndonjë gjë të padrejtë, nuk mendoj që po ju kërkojmë të bëni ndonjë sakrificë, nuk po ju kërkojmë të ktheheni në organizata bamirësie, po ju themi ‘fitoni, por lini të tjerët të marrin frymë’”, deklaroi Rama.
Kryeministri tha se është e papranueshme që çmimet e produkteve në Shqipëri të jenë më të larta se në vende të tjera, duke iu referuar të dhënave të Bankës së Shqipërisë.
Sipas Ramës, shifrat e Bankës së Shqipërisë tregojnë tre elementë që, sipas tij, duhet të reflektohen në çmimet për konsumatorët: zhvlerësimi i euros, rënia e inflacionit të importuar dhe diferencat në çmimet e produkteve të prodhuara në vend.
“Është e papranueshme që ato çmimet këtu janë mbi të tërë të tjerët dhe ajo që është dhe më e tmerrshme, është që shifrat e Bankës së Shqipërisë thonë 3 gjëra. E para që zhvlerësimi i euros duhet të sillte ulje të çmimeve që lidhen me euron; e dyta, që inflacioni i importuar ka rënë dhe treta që me produktet e brendshme këtu bëhet nami në çmime”, u shpreh kryeministri.
Rama tha se i njeh vështirësitë me të cilat përballen bizneset, përfshirë kostot e pagave dhe detyrimet e tjera, por theksoi se kjo nuk duhet të jetë pengesë për reflektimin e çmimeve.
“Mos mendoni që unë nuk e di se çfarë do të thotë të zgjohesh në mëngjes dhe të mendosh që do paguash rrogën në fund të muajit, se keni njerëz për të paguar, keni lloj-lloj vështirësish”, tha Rama.
Kërkesa e kryeministrit ndaj rrjeteve të supermarketeve vjen ndërsa qeveria synon të frenojë rritjen e çmimeve dhe të lehtësojë kostot për konsumatorët. Në të njëjtën kohë, Rama nuk njoftoi gjatë takimit ndonjë ulje të taksave nga ana e qeverisë, duke e vendosur përgjegjësinë për uljen e çmimeve te zinxhiri i tregtimit dhe bizneset.m.k
