Koreja e Veriut ka reaguar ashpër ndaj kapjes së presidentit venezuelian, Nicolás Maduro, nga autoritetet e Shteteve të Bashkuara, duke e cilësuar këtë veprim si një “cenim të rëndë të sovranitetit kombëtar”.
Në një deklaratë të shpërndarë nga agjencia shtetërore KCNA, një përfaqësues i Ministrisë së Jashtme të Koresë së Veriut theksoi se Pheniani “dënon fuqishëm aktin hegjemonist të SHBA-së të kryer ndaj Venezuelës”. Sipas tij, ngjarja përbën “një tjetër dëshmi të qartë të natyrës së egër dhe brutale të politikës amerikane”.
Autoritetet koreano-veriore, të cilat mbështesin prej vitesh regjimin socialist të Madurros në Karakas, e cilësuan largimin e presidentit venezuelian si një shkelje të rëndë të Kartës së Kombeve të Bashkuara dhe të së drejtës ndërkombëtare, që sanksionojnë respektimin e sovranitetit, mosndërhyrjen dhe integritetin territorial të shteteve.
Ky reagim vjen në një periudhë tensionesh të shtuara në Gadishullin Korean. Shefat e Përbashkët të Shtabit të Koresë së Jugut njoftuan se kishin zbuluar disa lëshime raketash balistike nga zona e kryeqytetit të Koresë së Veriut, rreth orës 07:50 të mëngjesit të së dielës, sipas kohës lokale.
Në javët e fundit, lideri i Koresë së Veriut, Kim Jong Un, ka intensifikuar vizitat në objekte ushtarake dhe fabrika armësh, ka inspektuar një nëndetëse me energji bërthamore dhe ka mbikëqyrur teste të reja raketore, në prag të Kongresit të Nëntë të Partisë së Punëtorëve. Në këtë forum pritet të përcaktohen objektivat kryesore politike dhe strategjike të vendit për vitet e ardhshme.
Prej dekadash, Pheniani ka argumentuar se programet e tij bërthamore dhe raketore janë thelbësore si mjet parandalues ndaj asaj që e cilëson si përpjekje të vazhdueshme të Uashingtonit për ndryshim regjimi.
