Pas vendimit për heqjen e masave të Bashkimit Evropian ndaj Kosovës, ka ardhur edhe reagimi i eurodeputetit holandez Thijs Reuten, i cili ka kërkuar që hapi i radhës të jetë shqyrtimi i aplikimit të Kosovës për statusin e vendit kandidat.
Vjosa Osmani dhe Costa në Bruksel
Reuten i ka cilësuar masat ndëshkuese të BE-së ndaj Kosovës si “katastrofale”, duke theksuar se ato kanë penguar padrejtësisht rrugëtimin evropian të vendit. Në një reagim në platformën X, ai ka shkruar: “Më në fund. Urime Kosovë. Çfarë katastrofe ka qenë kjo politikë e BE-së. Tani mund të vazhdojmë përsëri rrugën evropiane të Kosovës. Hapi i radhës: procedimi i aplikimit për anëtarësim të Kosovës, i cili ka mbetur në sirtar prej vitesh”.
Lajmi për heqjen e masave u bë i ditur nga presidentja e Kosovës, Vjosa Osmani, e cila njoftoi se Bashkimi Evropian do t’i heqë të gjitha masat ndaj Kosovës në fund të muajit janar të vitit të ardhshëm.
Të mërkurën në mbrëmje, pas përfundimit të Samitit BE–Ballkani Perëndimor në Bruksel, Osmani deklaroi se kishte marrë konfirmim të drejtpërdrejtë nga presidentja e Komisionit Evropian, Ursula von der Leyen, se masat ndaj Kosovës do të hiqen plotësisht në janar. a.b
