U vetëplagos aksidentalisht në banesë, në Marikaj, me armën e zjarrit që e posedonte pa leje, dhe më pas shtiu disa herë, që të inskenonte një atentat ndaj tij, vihet në pranga 40-vjeçari.
I arrestuari, i dënuar më parë për armëmbajtje pa leje dhe për krime kundër pronës.
Vihet në pranga dhe një 43-vjeçar, për moskallëzim krimi.
“U arrestua E. A.(M.), 40 vjeç (shtetasi i dëmtuar) dhe S. K., 43 vjeç, të dy banues në fshatin Marikaj.
Nga hetimet dyshohet se 40-vjeçari është vetëplagosur aksidentalisht, në banesë, me një armë zjarri, të cilën e posedonte pa leje dhe më pas ka shtënë disa herë, që të inskenonte një atentat ndaj tij. Për të penguar zbulimin e së vërtetës, ky shtetas ka hequr DVR-në e një kamere të sigurisë pranë banesës së tij.
Shtetasi S. K. e ka transportuar 40-vjeçarin në spital dhe gjatë veprimeve procedurale nga Policia, nuk ka kallëzuar për rrethanat e ngjarjes”, njoftoi policia e Tiranës.
40-vjeçari vijon të jetë në kujdesin e mjekëve, jashtë rrezikut për jetën. a.b
