Ministria e Jashtme e Shqipërisë njoftoi sot për një aksident të rëndë rrugor në Gjermani. Sipas njoftimit kanë humbur jetën tre shqiptarë ndërsa 4 të tjerë janë plagosur.
“Ministria për Evropën dhe Punët e Jashtme është informuar nga autoritetet gjermane për një aksident të rëndë rrugor të ndodhur në orët e para të mëngjesit të datës 25 maj, pranë qytetit Koblenz, ku janë përfshirë disa shtetas shqiptarë. Me keqardhje njoftojmë se si pasojë e këtij aksidenti kanë humbur jetën tre shtetas shqiptarë, ndërsa katër të tjerë janë plagosur dhe po marrin trajtim në spitalet lokale”, thuhet në njoftim.
E humbën jetën një burrë 53-vjeçar dhe dy gra të moshës 47 dhe 65 vjeç. Personat e tjerë ishin midis moshës 20 dhe 66 vjeç dhe nuk u plagosën rëndë, tha policia gjermane. Ata po udhëtonin me një minibus 9-vendësh.
Ambasada e Republikës së Shqipërisë në Berlin dhe Konsullata e Përgjithshme në Mynih kanë qenë në kontakt të vazhdueshëm me autoritetet gjermane dhe kanë ndjekur nga afër zhvillimet.
Hetimet për rrethanat e aksidentit janë ende në vijim, ndërsa Ministria për Evropën dhe Punët e Jashtme shpreh ngushëllimet për familjet e viktimave dhe uron shërim të plotë për të plagosurit, thuhet në njoftimin e ministrisë. a.b
