PD ngre alarmin për votimin e emigrantëve në Greqi: Zarfet nuk mbërrijnë në adresë, 6 mijë të dorëzuara për një ditë ngrenë dyshime për manipulim.
2025_3715_Partia Demokratike_Kerkese per nderhyrje urgjente
Partia Demokratike ka dorëzuar një kërkesë zyrtare për ndërhyrje urgjente pranë KQZ duke ngritur shqetësime serioze mbi mënyrën si po administrohet procesi i votimit për emigrantët shqiptarë në Greqi për zgjedhjet e 11 majit.
Në letër PD deklaron se “qytetarët nuk po marrin në kohë dhe në adresat e duhura zarfin me materialet zgjedhore të nevojshme për votim”, duke e cilësuar situatën si një “shkelje të rëndë të së drejtës themelore për të votuar”.
Sipas të dhënave të përfshira në këtë dokument, një shqetësim i madh ka lindur nga fakti se “nga të dhënat e publikuara nga KQZ, rezulton se në një ditë të vetme janë dorëzuar mbi 6,000 zarfe, ndërkohë që për gjithë periudhën janë dorëzuar 17,000 në total”. Sipas Partisë Demokratike, kjo është provë e qartë se zarfe të shumta janë grumbulluar nga pak duar dhe janë dërguar në mënyrë të centralizuar, duke minuar procesin individual të votimit të lirë dhe të barabartë.
“Presim nga institucioni juaj që të reagojë pa vonesë, në përputhje me mandatin dhe përgjegjësinë kushtetuese për të mbrojtur të drejtat e qytetarëve shqiptarë, brenda dhe jashtë vendit,” thuhet në përfundim të kërkesës së PD-së. a.b
