Ish-kryeministri Sali Berisha akuzoi sot qeverinë “Rama”, se fondet e ndara për fermerët po shfrytëzohen për qëllime korruptive, ndërsa fermerët po përballen me kushte gjithnjë e më të vështira. Në një deklaratë për shtyp, Berisha tha se nga 40 milionë eurot e planifikuara për këtë sektor, rreth 55-60% përfundon në administratë, ndërsa vetëm 18 milionë shkojnë tek fermerët.
“Ky është një qëndrim armiqësor ndaj fermerëve të cilët përballen me çmime të larta për inputet bujqësore dhe taksa të padrejta, me 20% TVSH për produktet që shesin, ndërsa nuk marrin asnjë informacion për orientimet e tregut,” tha Berisha.
Ai përmendi gjithashtu mungesën e mbështetjes dhe këshillave për fermerët, që sipas tij ka sjellë një rënie të madhe të prodhimit bujqësor dhe blegtoral, përfshirë një ulje prej 50% të numrit të gjedheve në vend gjatë 4-5 viteve të fundit.
Berisha akuzoi qeverinë se fondet për bujqësinë përqendrohen në sektorë ku, sipas tij, është më e lehtë për të vjedhur, përfshirë projekte të mëdha infrastrukturore që menaxhohen nga zëvendëskryeministrja Belinda Balluku. Ai pretendoi se një pjesë e madhe e buxhetit kontrollohet nga Balluku, të cilën e akuzoi për korrupsion në ndarjen e kontratave të unazës së Tiranës për interesa të ngushta.
Në fund të deklaratës, Berisha ngriti alarmin se politikat e qeverisë po i shtyjnë fermerët të braktisin Shqipërinë, duke e lënë tokën pjellore të vendit të papunuar. Ai i bëri thirrje qytetarëve të mos harrojnë, sipas tij, vjedhjet e qeverisë “Rama-Balluku”, duke e quajtur këtë një “goditje të mëshirës” ndaj një sektori që përfaqëson 20% të prodhimit të brendshëm të vendit.a.b
